
सावंतवाडी : कारीवडेतील गोसावी समाज व गावचे रहिवासी यांनी श्री सिद्ध महापुरुष समाधी मंदिर या जागृत देवस्थानातील धार्मिक भावना दुखावल्या तसेच धार्मिक पवित्र वस्तूंची तोडफोड केल्याप्रकरणी गणपत रामा गोसावी यांच्यावर फौजदारी गुन्हा दाखल करावा अशी मागणी पोलीस निरीक्षक ऋषिकेश अधिकारी यांच्याकडे केली आहे.
यात म्हंटले आहे की, आम्ही कारिवडे गावचे रहिवासी असून आम्ही संपूर्ण समाजासह अत्यंत शांततेने व गुण्यागोविंदाने राहतो. परंतु, आमच्या गावातील समाजकंटक गणपत रामा गोसावी (राहणार कारिवडे) या व्यक्तीने कोणतेही कारण नसताना श्री सिद्ध महापुरुष समाधी मंदिरात भाविक उपस्थित असताना आडदांडपणे व दांडगाईने मंदिरात प्रवेश करून तेथील पुजारी बाबीनाथ यशवंत गोसावी (बाबा बुवा) यांना मारहाण करून त्यांच्या गालाचा चावा घेतला तसेच मंदिर गाभा-यातील पवित्र त्रिशूळ वाकविला व समाधीची विटंबना केली.
हे मंदिर सावंतवाडी तालुक्यातील जागृत देवस्थान असून हे मंदिर कारिवडे ग्रामदेवता कालिका माता तसेच ओठवणे येथील श्री देव रवळनाथ या धार्मिक स्थळांशी धार्मिक संबंधाने जोडलेले आहे. तसेच सावंतवाडीचे संस्थानिक सावंत भोसले राजघराण्याशी या मंदिराचे धार्मिक संबंध आहेत. या मंदिरात 9जुलै 2023 रोजी सायंकाळी सातच्या सुमारास गणपत रामा गोसावी या व्यक्तीने उपद्रव देण्याच्या उद्देशाने कोणतेही कारण नसताना मंदिरात भाविक उपस्थित असताना पुजारी बाबीनाथ यशवंत गोसावी (बाबा बुवा) या समाजातील जेष्ठ व वयोवृद्ध व्यक्तीस अश्लील शिवीगाळ करून मारहाण तसेच गालाच्या खाली हनुवटी कडील भागाचा चावा घेऊन दुखापत केली व अत्यंत दांडगाइने व बलप्रयोग करून मंदिराच्या गाभाऱ्यात असलेला देवाचा पवित्र असा त्रिशूळ वाकवून तो तोडण्याचा प्रयत्न केला. समाधीची विटंबना करून बुद्धिपुरस्कर व दुष्ट उद्देशाने आमच्या उपासना स्थानाचे नुकसान करून त्यास अपवित्र केले आहे.
या व्यक्तीवर गुन्हा दाखल व्हावा व पुजारी यांना केलेल्या मारहाणी बद्दल योग्य ती शिक्षा करावी व लवकरात लवकर अटक करावे अशी मागणी केली आहे.