​दोडामार्ग : दोडामार्ग तालुक्यातील नारळ आणि सुपारी या प्रमुख पिकांवर अवलंबून असलेल्या शेकडो कुटुंबांना आधुनिक आणि शास्त्रोक्त मार्गदर्शन मिळावे, या हेतूने कोलझर विभाग विविध कार्यकारी सहकारी सेवा सोसायटी लिमिटेड, कोलझर यांच्या वतीने 'शेतकरी बागायतदार मेळावा' आयोजित करण्यात आला. या मेळाव्यात बाळासाहेब सावंत कोकण कृषी विद्यापीठाचे (BSKKV) शास्त्रज्ञ आणि जिल्हा बँकेचे अध्यक्ष मनिष दळवी यांनी व अन्य पदाधिकाऱ्यांनी मार्गदर्शन केले.

कोलझर सोसायटीच्या शेतकरी मेळाव्याच्या ​या कार्यक्रमाचे अध्यक्षस्थान जिल्हा मध्यवर्ती बँक लिमिटेड, सिंधुदुर्गचे अध्यक्ष मनीष दळवी यांनी भूषवले. अध्यक्षीय भाषणात बोलताना दळवी म्हणाले की, ग्रामीण भागातील सहकारी संस्था सक्षम होण्यासाठी जिल्हा बँक सातत्याने प्रयत्नशील आहे. त्याचबरोबर केंद्र व राज्य सरकारच्या वतीने सहकार वाढविण्यासाठी अनुकूल निर्णय घेतले जात आहेत, याचा लाभ सहकारी संस्थांनी घेऊन शेतकरी सक्षम करण्यासाठी प्रयत्न करावेत.

​त्यांनी जाहीर केले की, जिल्हा बँक आपल्या नफ्यातून सहकारी संस्थांच्या सक्षमीकरणासाठी मदत करणार असून, यासाठी बँक आपल्या पाठीशी खंबीरपणे उभी राहील. विशेषतः कोलझर सोसायटीला कार्यालय व सुसज्ज इमारत उभारण्यासाठी जिल्हा बँक सहकार्य करेल, असे आश्वासन त्यांनी यावेळी दिले.

शास्त्रज्ञांचे मोलाचे मार्गदर्शन

​बदलत्या वातावरणामुळे अडचणीत आलेल्या बागायतींना आधुनिक पद्धतीने कसं उभारायचं आणि त्यातून आर्थिक उन्नती कशी साधायची, यावर मार्गदर्शन करण्यासाठी विद्यापीठातील शास्त्रज्ञ उपस्थित होते. ​जिल्हा फळ संशोधन केंद्र, मुळदे येथील शास्त्रज्ञांनी सुपारी आणि नारळ बागायतीची लागवड, उत्पादन वाढीचे तंत्र, खते, बी-बियाणे आणि वनस्पती विकृतीशास्त्र (Plant Pathology) या विविध पैलूंवर शेतकरी-बागायतदारांना सखोल मार्गदर्शन केले.

​मार्गदर्शकांमध्ये  डॉ. आर. आर. राठोड,  डॉ. एम. एस. शेडगे (सहाय्यक प्राध्यापक, उद्यानविद्या),  डॉ. वाय. सी. मुठाळ (तांत्रिक अधिकारी) यांचा समावेश होता. यावेळी सहकार क्षेत्रात योगदान देणाऱ्या अनेक सुपुत्रांचा जाहीर सत्कारकरण्यात आला. ​यावेळी सहकार आणि कृषी क्षेत्रातील भरीव कामगिरीबद्दल दोन सिंधुदुर्ग सुपुत्रांचा जाहीर सत्कार करण्यात आला. मनीष दळवी (अध्यक्ष, जिल्हा बँक) यांचा सहकार क्षेत्रात केलेल्या भरीव कामगिरीबद्दल सत्कार करण्यात आला.

​डॉ. विजय दळवी (सहयोगी अधिछता, उद्यानविद्या महाविद्यालय, मुळदे) यांचा उत्कृष्ट शास्त्रज्ञ पुरस्कार मिळाल्याबद्दल सत्कार करण्यात आला. डॉ. विजय दळवी हे या कार्यक्रमाचे प्रमुख पाहुणे होते. या मेळाव्याला विशेष उपस्थिती म्हणून सहाय्यक निबंधक, सहकारी संस्था, दोडामार्ग श्री सुजय तसेच कदम जिल्हा बँक संचालक श्री. गणपत देसाई, विकास अधिकारी श्री. संजय ठाकर, आणि संस्थेचे संचालक उपस्थित होते. संस्थेच्या या कार्यक्रमात अनेक माजी अध्यक्षांचाही सत्कार करण्यात आला. मेळाव्याला पंचक्रोशीतील शेतकरी-बागायतदार मोठ्या संख्येने उपस्थित होते. यावेळी पत्रकार शिवप्रसाद देसाई याचा सत्कार करण्यात आला तसेच अन्य उपस्थित पत्रकार यांचा गौरव करण्यात आला.  हा कार्यक्रम कोलझर विभाग विकास सहकारी सेवा सोसायटी लि. कोलझरचे अध्यक्ष आणि संचालकांच्या नेतृत्वाखाली यशस्वीरित्या पार पडला. यावेळी सहकार क्षेत्रातील मान्यवर उपस्थित होते तसेच मोठ्या प्रमाणावर शेतकरी उपस्थित होते.