कणकवली : मडगांवच्या दिशेने जात असलेल्या नेत्रावती एक्सप्रेसमधून पडून अमित राजभर (३०, उत्तर प्रदेश) या युवकाचा मृत्यू झाला. ही घटना खारेपाटण रेल्वेस्थानकानजीक रविवारी रात्री ९.३० वा. सुमारास घडली. अमित हा आपला मामेभाऊ व चुलत भाऊ यांच्या सोबत नेत्रावती एक्सप्रेसच्या जनरल बोगीमधून प्रवास करत होता. तोंड धुण्यासाठी दरवाजानजीकच्या बेसिनजवळ गेलेल्या अमित याचा तोल गेला व तो ट्रेनबाहेर पडला. यामध्ये त्याच्या डोक्याला, तोंडाला गंभीर दुखापत झाली. घटनेची माहिती समजतात रेल्वे सुरक्षा बलाच्या कर्मचाऱ्यांनी घटनास्थळी धाव घेतली. मात्र पाहणी केली असता अमित जागीच मृत्युमुखी पडला होता. याबाबत अमित याच्यासोबत असलेला भाऊ दिलीप राजभर (३१, रा. उत्तर प्रदेश) याने दिलेल्या खबरीनुसार घटनेची कणकवली पोलीस ठाण्यात आकस्मिक मृत्यू म्हणून नोंद करण्यात आली आहे.
