सिंधुदुर्गनगरी : नवविवाहिता प्रिया चव्हाण यांना आत्महत्या करण्यास प्रवृत्त केल्याप्रकरणी देवगड येथील प्रणाली माने आणि आर्य माने यांना तात्काळ अटक करावी अशी मागणी जिल्हा पोलिस अधीक्षक मोहन दहीकर यांच्याकडे शिवसेना उद्धव बाळासाहेब ठाकरे गटाच्यावतीने करण्यात आली आहे.
उबाठाच्या वतीने देण्यात आलेल्या लेखी निवेदनात असे नमूद केले आहे की, सावंतवाडी - माठेवाडा निर्माण प्लाझा येथील नवविवाहिता प्रिया पराग चव्हाण हिचा मानसिक छळ करुन तिला आत्महत्येस प्रवृत्त केल्याप्रकरणी देवगड येथील प्रणाली मिलिंद माने व त्यांचा मुलगा आर्य माने यांच्यावर सावंतवाडी पोलिस ठाण्यात गुन्हा दाखल करण्यात आला आहे. याप्रकरणी प्रिया हिचे वडील विलास तावडे यांनी सावंतवाडी पोलिस ठाण्यात रविवारी तक्रार दिली आहे. प्रणाली माने या भाजप पक्षाच्या देवगड नगर पंचायतच्या माजी नगराध्यक्षा व विद्यमान नगरसेविका आहेत. त्यामुळे या प्रकरणात राजकीय हस्तक्षेप होत असल्यानेच प्रणाली माने आणि आर्य माने यांना पोलिसांनी अद्याप अटक केलेली नाही. त्याचबरोबर याप्रकरणात प्रणाली माने यांच्या नवऱ्याची देखील चौकशी करावी. घटनेनंतर प्रकरण मिटविण्यासाठी माने कुटुंबियांनी कोणाकोणाला फोन केले त्याचे सीडीआर तपासावेत. प्रिया चव्हाण यांना मारहाण झाल्याचेही माहिती असून तिच्या आत्महत्ये अगोदर घटना स्थळावर कोण कोण आले, कोणाच्या गाड्या आल्या याचा सीसीटीव्ही फुटेजद्वारे तपास करण्यात यावा.
प्रिया चव्हाण यांच्या कुटुंबियांना न्याय मिळवून देण्यासाठी निःपक्षपातीपणे या प्रकरणाची चौकशी करावी आणि प्रणाली माने आणि आर्य माने यांना तात्काळ अटक करण्यात यावी. अशी मागणी शिवसेना बाळासाहेब ठाकरे गटाच्यावतीने जिल्हा पोलिस अधीक्षक मोहन दहीकर यांच्याकडे करण्यात आली आहे.
यावेळी माजी आमदार वैभव नाईक, परशुराम उपरकर, कणकवली विधानसभा प्रमुख सतीश सावंत, महिला जिल्हा प्रमुख नीलम पालव, देवगड तालुका प्रमुख रविंद्र जोगल, देवगड नगरसेवक विशाल मांजरेकर, युवासेना जिल्हाप्रमुख सुशांत नाईक, देवगड महिला तालुकाप्रमुख हर्षा ठाकूर आदी उपस्थित होते.
