दोडामार्ग : कत्तलीसाठी गुरे वाहतूक होत असल्याचा संशय आल्याने गोरक्षकांनी पाठलाग करून पकडलेल्या टेंपोतून खैराची बेकायदेशीर वाहतूक होत असल्याचा धक्कादायक प्रकार समोर आला. यावेळी ही वाहतूक करणारा मुख्य आरोपी संदेश नाईक ( रा. तळवडे ता.सावंतवाडी) यांच्याकडे सखोल चौकशी केली असता, त्याच्या व्हाट्सअॅपवर पिस्तूलासारख्या हत्याराचे विविध व्हिडीओ आढळले त्यामुळे एकच खळबळ उडाली. या प्रकाराची माहिती वनविभागाला दिल्यावर वनकर्मचाऱ्यांनि सर्व मुद्देमाल जप्त करत गुन्हा दाखल केला आहे. तर त्याच्या मोबाइलमधील व्हाट्सअॅपवर असलेल्या पिस्तूलाच्या व्हिडीओ संदर्भात चौकशी करण्यासाठी आपण पोलिसांना पत्र लिहिणार असल्याची माहिती वनक्षेत्रपाल वैशाली मंडल यांनी दिली.
याबाबत अधिक माहिती अशी की, दोडामार्गमार्गे एका टेंपोमधून कत्तलखान्यात कत्तल करण्यासाठी गायी नेल्या जात असल्याची माहिती दोडामार्गमधील गोरक्षकांना मिळाली. त्यांनी याबाबतची माहिती कसई - दोडामार्गचे नगराध्यक्ष चेतन चव्हाण, भाजपा अध्यक्ष दीपक गवस , खोक्रल सरपंच देवेन्द्र शेटकर, सरपंच सेवा संघाचे जिल्हाध्यक्ष प्रवीण गवस आदींना दिली. लागलीच गोरक्षकांनी ही गाडी मणेरी येथे अडवून तिची तपासणी केली असता त्यातून बेकायदेशीररित्या खैराच्या झाडांची वाहतूक होत असल्याचे समोर आले. याबाबतची माहिती वनक्षेत्रपाल वैशाली मंडल यांना दिल्यावर त्या लागलीच घटनास्थळी दाखल झाल्या. संशयित आरोपी संदेश नाईक यांच्याकडे चौकशी केली असता त्याने इतर मुद्देमालही दाखविला. त्याचा पंचनामा करून तो वनाधिकाऱ्यांनि जप्त केला व संशयितांवर गुन्हा दाखल केला.
