सावर्डे : छत्रपती शिवाजी स्टेडियम, रत्नागिरी येथे दिनांक 14 ऑक्टोबर 2025 रोजी झालेल्या कोल्हापूर विभाग स्तरीय कबड्डी स्पर्धेत सह्याद्री शिक्षण संस्था संचलित गोविंदराव निकम माध्यमिक व उच्च माध्यमिक विद्यालय, सावर्डे येथील 14 वर्षांखालील मुलांचा कबड्डी संघ उपविजेता ठरला. या स्पर्धेत कोल्हापूर विभागातील एकूण आठ संघांनी सहभाग घेतला होता.

या स्पर्धेत सावर्डे विद्यालयाच्या खेळाडूंनी उल्लेखनीय कामगिरी करत उत्कृष्ट खेळकौशल्य दाखवले. संघातील अथर्व रवींद्र घाणेकर, समर्थ घाणेकर, संस्कार घाणेकर, श्रेयश कातकर, मानव भुवड, ध्रुव घाणेकर, दिपराज चाळके, ओम घाणेकर, आर्यन घाणेकर, आर्यन यादव, आयुष राडे व सार्थक म्हादे यांनी संघभावना आणि चिकाटीच्या जोरावर प्रभावी खेळ सादर केला.

अंतिम फेरीत कोल्हापूर ग्रामीण विरुद्ध रत्नागिरी सावर्डे असा रोमांचक सामना रंगला. अत्यंत चुरशीच्या या सामन्यात सावर्डे संघाने प्रभावी बचाव आणि चढाई करत उपविजेतेपद पटकावले. समर्थ घाणेकरच्या धडाडीच्या चढायांमुळे संघ अंतिम फेरीत पोहोचला, तर संस्कार घाणेकर आणि श्रेयश कातकर यांच्या सुपर टकलमुळे संघाला बळ मिळाले. विजयी संघाचे शाळेत आगमन झाल्यावर प्राचार्य राजेंद्र वारे व उपप्राचार्य विजय चव्हाण यांनी खेळाडूंचा सत्कार करून अभिनंदन केले. या संघाचे प्रशिक्षक दादासाहेब पांढरे, रोहित गमरे, अमृत कडगावे आणि प्रशांत सकपाळ यांनी खेळाडूंना मोलाचे मार्गदर्शन केले.

या यशामुळे सावर्डे विद्यालयाने पुन्हा एकदा जिल्हा व विभागीय पातळीवर आपली दमदार छाप सोडली आहे. यशस्वी खेळाडू व मार्गदर्शक शिक्षकांचे सह्याद्री शिक्षण संस्थेचे कार्याध्यक व आमदार शेखरजी निकम,ज्येष्ठ संचालक व शालेय समितीचे चेअरमन शांताराम खानविलकर,संस्थेचे सर्व संचालक व पदाधिकारी, सचिव महेश महाडिक,शालेय समितीचे सर्व पदाधिकारी व विद्यालयाचे प्राचार्य राजेंद्र वारे, उपप्राचार्य विजय चव्हाण,विद्यालयातील सर्व शिक्षक, शिक्षकेतर कर्मचारी यांनी अभिनंदन केले आहे.