कणकवली : भरधाव वेगाने येणाऱ्या कारने दुचाकीला पाठीमागून धडक दिली. या अपघातामध्ये दुचाकीवरील पती, पत्नीसह चिमुकला जखमी झाला आहे. ही घटना शुक्रवारी रात्री १०.४० वा. सुमारास कणकवलीतील आप्पासाहेब पटवर्धन चौक येथे घडली. जखमी तिघांवर शहरातील खासगी रूग्णालयात उपचार सुरू आहेत. या अपघातप्रकरणी कारचालक राजमल मेघावाल (रा.उदयपूर - राजस्थान) याच्यावर कणकवली पोलीस ठाण्यात गुन्हा दाखल करण्यात आला आहे.
तालुक्यातील हरकुळ बुद्रूक - देऊळवाडी येथील विजय विष्णू घाडीगावकर (वय ३६) हे आपली पत्नी वीणा (वय ३०) आणि दोन वर्षाचा विहांश यांच्यासह कणकवलीतील एका बँकेतील एटीएममध्ये पैसे भरण्यासाठी आले होते. रात्री १०.३०वाजता पैसे भरणा झाल्यानंतर ते महामार्गावरील सेवा रस्त्यावरून, आपल्या घरी दुचाकीने जात होते. रात्री १०.४० वाजण्याच्या दरम्यान कणकवली पटवर्धन चौकातील हॉटेल लोकप्रिय येथे त्यांच्या दुचाकीला पाठीमागून येणाऱ्या कारची जोरदार धडक बसली. यात दुचाकीवरील विजय, त्यांची पत्नी वीणा, मुलगा विहांश हे रस्त्याच्या कडेला कोसळले. यात वीणा यांच्या डोक्याला मार बसल्याने त्या गंभीर जखमी झाल्या. तर विजय आणि विहांश यांनाही मुका मार बसला.
अपघातानंतर कारचालक तेथे न थांबता पटवर्धन चौकातून गाडी वळवून मुंबईच्या दिशेने पळाला. मात्र त्याच भागातील पुजारी इलेक्ट्रॉनिक्स समोर स्थानिकांनी त्याला अडवून चोप दिला. तर तिघा जखमींना शहरातील खासगी रूग्णालयात दाखल केलेे. यात वीणा घाडीगावकर यांच्या डोक्याला मार बसून मोठा रक्तस्त्राव झाल्याने त्या गंभीर जखमी झाल्या आहेत. अपघाताची खबर विजय घाडीगावकर यांनी शनिवारी पोलीस ठाण्यात दिली. त्यानुसार हयगयीने, अविचाराने आणि रस्त्याच्या विशिष्ट परिस्थितीकडे लक्ष न देता भरधाव वाहन चालवून अपघातास कारणीभूत ठरल्याप्रकरणी कारचालक राजमल मेघावाल याच्याविरोधात पोलिसांनी गुन्हा दाखल केला आहे.
