सावंतवाडी : सावंतवाडी बसस्थानकाच्या झालेल्या दुरावस्थेमुळे प्रवाशांचे होणारे हाल सरकारच्या कानापर्यंत पोहोचवण्यासाठी माजी नगराध्यक्ष बबन साळगावकर यांच्या नेतृत्वाखाली घंटानाद आंदोलन छेडण्यात आले. स्थानिक आमदार दीपक केसरकर यांना यावरून लक्ष करण्यात आलं. त्यांच्या वाढदिनी प्रवाशांना होणाऱ्या त्रासाची जाणीव करून देण्यासाठी हे आंदोलन छेडल्याच माजी नगराध्यक्ष बबन साळगावकर म्हणाले.
सावंतवाडी एसटी बस स्थानकासमोर हे घंटानाद आंदोलन छेडण्यात आले. माजी नगराध्यक्ष बबन साळगावकर यांच्या नेतृत्वाखाली झालेल्या या आंदोलनाला महाविकास आघाडीन पाठिंबा दिला. यावेळी माजी नगराध्यक्ष बबन साळगावकर म्हणाले, बस स्थानक दुरावस्थेबाबत स्थानिक आमदार केसरकर यांच्या वाढदिनी गेल्यावर्षी आंदोलन केलं होतं. तेव्हा कुणाच्या वाढदिनी आंदोलन करू नये अशी आमची कुच्छीतपणे चेष्टा केली होती. मात्र, वर्षभरात इथली परिस्थिती काही बदलेली नाही. त्यामुळे आज पुन्हा एकदा त्यांना जाग यावी, प्रवाशांच्या वेदना कळाव्यात यासाठी घंटानाद आम्ही करत आहोत. परिस्थिती बदलत नसल्यानं आमदार बदलायचाय हे घोषवाक्य घेऊन आम्ही यापुढे जाणार आहोत. गेल्या अडीच वर्षांत राज्य सरकारचा एकही मंत्री काम करू शकला नाही. हे सरकार मिंद्यांच सरकार म्हणूनच ओळखले जाते. जिल्ह्यातील एकही मंत्री जनतेची कामं करू शकला नाही. स्वतःची तुंबडी भराण्यासाठी मंत्री काम करत आहेत असा टोला जिल्ह्यातील महायुतीच्या मंत्र्यांना साळगावकर यांनी हाणला.
उबाठा शिवसेनेचे तालुकाप्रमुख रूपेश राऊळ म्हणाले, भुमिपूजन होऊन देखील गेली सात वर्षे हे बसस्थानक विकसीत झालं नाही. विकासापासून हा मतदारसंघ वंचित राहिला आहे. त्यामुळे येणारा आमदार हा इंडिया आघाडीचा असेल, प्रत्येक पक्षाला मागणी करण्याचा अधिकार आहे. दरम्यान, पोलिसांकडून नोटीस देऊन आंदोलन दडपण्याचा प्रयत्न झाल्यानं यावेळी निषेध व्यक्त करण्यात आला. यावेळी माजी नगराध्यक्ष बबन साळगावकर, उबाठा शिवसेना तालुकाप्रमुख रूपेश राऊळ, राष्ट्रवादी काँग्रेस शरदचंद्र पवार तालुका पुंडलिक दळवी, मायकल डिसोझा, चंद्रकांत कासार, बाळा गावडे, देवा टेमकर, शब्बीर मणियार, शैलेश गवंडळकर,आबा सावंत, शिवदत्त घोगळे, सावली पाटकर, सायली दुभाषी, रश्मी माळवदे, अफरोज राजगुरू आदी महाविकास आघाडीचे पदाधिकारी कार्यकर्ते उपस्थित होते.
