कुडाळ :  शाळा या विद्यार्थ्यांमधील कलागुणांना प्रकाशात आणणारी ज्ञानमंदिरे आहेत. विद्यार्थीदशेतच विविध माध्यमांद्वारे विद्यार्थ्यांतील कलागुण पारखता येतात. त्यासाठी शिक्षकांची सकारात्मक भूमिका व पालकांचा पाठिंबा आणि त्यांच्यातील कला गुण व क्षमता ओळखून तिला खतपाणी घालण्याची मानसिकता महत्त्वाची ठरते" असे उद्गार सुप्रसिद्ध गायिका केतकी भावे- जोशी यांनी काढले. त्याच्या हस्ते 26 जानेवारी रोजी ध्वजारोहण केल्यानंतर व बॅ. नाथ पै शिक्षण संस्थेमध्ये विविध शिक्षणक्रमाच्या वतीने आयोजित सांस्कृतिक कार्यक्रमामध्ये त्यांच्या कन्या सारेगामाप फेम स्वरा जोशी यांच्यासोबत अजरामर देशभक्तीपर व बालगीते सादर करताना आपले मनोगत व्यक्त करताना त्या बोलत होत्या.त्यांनी आपल्या पुढील मनोगतांमध्ये उपस्थित विद्यार्थ्यांना "आपल्यातील कला ओळखून त्यातील परिपूर्ण ज्ञान मिळवून त्याचा सराव करण्यास सांगितले.ज्यातून उद्याचा एखादा कलाकार घडू शकतो. या दृष्टीने बॅरिस्टर नाथ पै शिक्षण संस्थेचे चेअरमन उमेश गाळवणकर व त्यांच्या सहकाऱ्यांची, पालकांची सकारात्मक भूमिका,  संस्थेमध्ये मुलांसाठी उपलब्ध करून दिलेल्या सोयी- सुविधा याबद्दल समाधान व्यक्त केले व 26 जानेवारी रोजी आपल्या परिवाराला ध्वजारोहणाचा मान दिल्याबद्दल आपण भारावून घेण्याचे सांगून या सन्मानाबद्दल धन्यवाद दिले व स्वरा व त्यानी मिळून काही अजरामर देशभक्तीपर गीत व बालगीत सादर केली. 

त्यामध्ये "ए मेरे वतन के लोगो...',हे वतन,मेरे वतन...,' जयोस्तुते!जयोस्तुते!! श्री महान मंगले शिवास्पदे शुभदे..., ... तर स्वरा जोशी हीने "रोज रोज करून नुसतीच शाळा..., "ससा तो ससा की कापूस जसा..., "न म्हातारा इतुका.. अवघे पाऊणशे वयमान....," खंडेरायाच्या लग्नाला बानु नवरी नटली.... नवरी नटली बाई सुपारी फुटली.." अशी हृदयस्पर्शी व बहारदार गीत सादर करून उपस्थितांची दाद मिळविली. याला संगीत साथ प्रा.मंदार जोशी व सिद्धेश कुंटे यांनी दिली.

ध्वजारोहणासाठी उपस्थित जोशी परिवाराचे स्वागत आणि अभिनंदन करताना संस्था चेअरमन उमेश गाळवणकर यांनी तिच्या आई-वडिलांनी  स्वरावर केलेली संस्कार याचा त्यांनी आवर्जून उल्लेख केला. विद्यार्थ्यांना मार्गदर्शन करताना "आपण मोठे होतो. त्या मोठेपणाला व्यवहारवादामध्ये न तोलता सामाजिक बांधिलकी सतत जपावी." असा संदेश दिला. स्वराचे आई-वडील स्वराची ज्या पद्धतीने तिची कला जपत आहेत. तसेच आई वडील आपल्या साठी केलेल्या प्रयत्नांची त्यागाची जाणीव ठेवा. त्यांचे आभार माना.त्यांना मान द्या. असा सल्लाही दिला.यावेळी सुप्रसिद्ध गायिका   केतकी जोशी यांच्यासोबत त्यांचे पती अभिजीत जोशी, कन्या स्वरा जोशी, संस्था चेअरमन उमेश गाळवणकर,अमृता गाळवणकर, कल्पना भंडारी, चैताली बांदेकर, पल्लवी कामत, अरुण मर्गज, इत्यादी उपस्थित होते.