सावंतवाडी : शहरातील १७ दिवसांच्या गणरायाला पुढच्या वर्षी लवकर या अशी साद घालत वाजत गाजत निरोप देण्यात आला. गणेशभक्तांच्या जल्लोषात लाडक्या बाप्पाचे थाटामाटात विसर्जन करण्यात आले. ढोल ताशांचा गजर, पारंपरिक नृत्य व पालखीतून निघालेली बाप्पाची स्वारी विसर्जन मिरवणूकचे खास आकर्षण ठरली.
शहरात १७ दिवसांच्या गणपतींचे वाजत गाजत मोठ्या उत्साहात विसर्जन करण्यात आले. देव नरसोबा गणेशोत्सव मंडळ, जुना बाजार व भट्टीवाडा सावंतवाडी येथील सार्वजनिक गणेशोत्सव मंडळाच्या गणरायाला रात्री उशिरा निरोप देण्यात आला. सालाबादप्रमाणे पालखीतून निघालेली मिरवणूक खास आकर्षण होती. तसेच वारकरी भजन, समई नृत्य विसर्जन मिरवणूकीत लक्षवेधी ठरले. युवाई डीजे, ढोल पथकाच्या तालावर थिरकताना दिसली. महिला व युवकांच्या कार्यक्रमांनी विसर्जन मिरवणूकीच लक्ष वेधलं होत.
काही घरगुती गणपतींना देखील फटाक्यांच्या आतषबाजीसह वाजत गाजत गणरायाला निरोप देण्यात आला. गणपती बाप्पा मोरया, पुढच्या वर्षी लवकर या ! अशा जय घोषाने आसमंत दुमदुमून गेला होता. पुढच्या वर्षी लवकर येण्याचे वचन घेत जड अंतकरणाने निरोप देण्यात आला. यावेळी गणरायांना निरोप देण्यासाठी मोठ्या संख्येने गणेशभक्त मोती तलाव काठी उपस्थित होते.
