सावंतवाडी : मल्टीस्पेशालिटी हॉस्पिटलबाबतचा करार हा शासनाकडून करण्यात आला होता, आमच्याकडून नाही. त्यामुळे त्यात आम्ही अटी शर्ती घालण्याचा प्रश्नच येत नाही. 'त्या' करारावर आम्ही एकदा नाही तर दोन वेळा सह्या केल्यात. तिसऱ्यांदाही करायला तयार आहोत. उर्वरित सही घेण्याची जबाबदारी ही शासनाची आहे. त्यासाठी दोन एकर जागा आम्ही मोफत दिली आहे. असे असताना केवळ निवडणुकीत जनतेला चुकीची माहिती देणे योग्य नाही. स्वतःच्या निवडणुकीत त्या कराराचा फायदा घेतला गेला व आता गैरफायदा घेतला जात आहे असं मत सावंतवाडी संस्थांचे युवराज लखमराजे भोंसले यांनी केला. तसेच सावंतवाडीचं सौंदर्य हा ऐतिहासिक मोती तलाव आहे. त्याचे संवर्धन करण्यासाठी राजघराण्याने नेहमीच प्रयत्न केलेत. मात्र, २००३ मध्ये याच तलावात हॉटेल उभारण्याचा प्रस्ताव कोणी आणला होता ? असा सवाल त्यांनी केला. आयोजित पत्रकार परिषदेत ते बोलत होते.
ते म्हणाले, तलावामध्ये कोणत्याही चुकीच्या गोष्टी करू देणार नाही, आम्ही करणारही नाही. आज मोती तलावात कन्स्ट्रक्शन उभारलं जाणार असा गैरसमज पसरविला जात आहे. मोठी तलावाचे सुशोभीकरण तसेच ज्या पर्यटनाच्या दृष्टीने व लोकांच्या दृष्टीने चांगल्या गोष्टी होत होत्या त्याला आम्ही कधीही विरोध केला नाही. उदाहरण द्यायचं झालं तर मोती तलावातील संगीत कारंजा तसेच बोटिंग प्रकल्प याला आम्ही कधीही विरोध केला नाही. मात्र ऐतिहासिक मोती तलावाचे कॉक्रिटीकरण होऊ नये व त्याचा ऐतिहासिकपणा राखला जावा हा आमचा हेतू राहिला आहे. सावंतवाडीतील राजघराण्याने शहरातील नागरिकांसाठी अनेक प्रकल्प उभारले अनेक गोष्टी केल्यात. मात्र, त्याची आम्ही कधीही प्रसिद्ध केली नाही. यापुढेही भारतीय जनता पार्टीच्या माध्यमातून व पालकमंत्री नितेश राणे, प्रदेशाध्यक्ष रवींद्र चव्हाण, स्थानिक आमदार दीपक केसरकर व नगरपालिकेच्या माध्यमातून आम्हाला हा विकास पुढे न्यायचा आहे. आमचा अजेंडा केवळ विकासाचा आहे आम्हाला कोणावरही टीका करायची नाही. आमच्या पूर्वजांनी आम्हाला तसे संस्कार दिलेत. राजवाडा हा केवळ एक टॅग आहेळ आम्ही सर्वसामान्यच आहोत सेवा हाच आमचा हेतू आहे. भाजपला निवडून दिल्यास निश्चितच आम्ही हॉस्पिटल पूर्ण करू, दीपक केसरकर यांना सोबत घेऊन ते करू कारण, आरोग्याचा विषय महत्वाचा आहे. दोन वेळा आम्ही सह्या केल्यात. एक सही घेण्याची जबाबदारी शासनाची आहे. यात अडचण होत असल्यास अन्यत्र जागा आरक्षित आहे. तिथे मल्टि स्पेशालीटी हॉस्पिटल व्हावे, अभिनव फाउंडेशनच्या जनहीत याचिकेच्या निमित्ताने या गोष्टी समोर आल्यात.
दरम्यान, राजवाड्याचा गेट कधीही बंद नसतो. तिथे सुरक्षारक्षक देखील नेमलेले नाहीत. शेकडो पर्यटक तसेच नागरिक रोज राजवाड्यात असतात. नगराध्यक्ष झाल्यावर श्रद्धाराजे नगरपालिकेत बसणार आहेत, राजवाड्यात नाही. त्या व आम्ही देखील जनतेसाठी २४ तास उपलब्ध राहणार, जनतेची सेवा हाच आमचा अजेंडा आहे. आम्ही या निवडणुकीत विकासाच्या मुद्द्यावर जनतेपर्यंत जात आहोत. मुंबई गोवा महामार्ग शहराबाहेरून गेला असला तरीही शहरात पर्यटक आणण्याच्या दृष्टीने विविध पर्यटनात्मक प्रकल्प राबवून पर्यटकांना व येथील नागरिकांना विविध सुविधा उपलब्ध करून देता येतील. केसरी येथे दुर्गम भागात मत्स्य एक्वेरियम असून देखील आज दिवसाला हजारो पर्यटक तेथे भेट देतात. त्यामुळे तशा पद्धतीचे पर्यटन प्रकल्प शहरात राबविल्यास पर्यटक येऊ शकतात असे ते म्हणाले. श्रद्धाराजे यांनी मराठी शिक्षण घेतले आहे. लग्नानंतर त्यांनी येथील भाषा व संस्कृती स्वीकारली आहे. त्या मराठी वाचू शकतात व लिहूही शकतात. मुळात प्रशासन चालविण्यासाठी भाषेचा कोणताच अडथळा येऊ शकत नाही. तसेच व विकासाचा प्रश्नच येत नाही, असेही त्यांनी यावेळी स्पष्ट केले.
