कणकवली : “आम्ही कोणावर टीका-टिप्पणी करत नाही; पण ही कणकवलीची जनता वर्षानुवर्षे खासदार नारायण राणे साहेबांच्या बाजूने ठामपणे उभी आहे. साहेबांवर असलेलं जनतेचं प्रेमच भाजपच्या पाठीशी आहे,” असा विश्वास पालकमंत्री नितेश राणे यांनी व्यक्त केला.
कणकवली नगरपंचायत निवडणुकीच्या पार्श्वभूमीवर भारतीय जनता पक्षाच्या नगराध्यक्ष पदाचे उमेदवार समीर नलावडे व नगरसेवक पदाचे उमेदवार यांच्यासह कणकवली बाजारपेठेतून भव्य प्रचार रॅली काढण्यात आली. या रॅलीत मंत्री नितेश राणे, भाजप जिल्हाध्यक्ष प्रभाकर सावंत, जिल्हा उपाध्यक्ष संदेश उर्फ गोट्या सावंत, तालुका अध्यक्ष मिलिंद मेस्त्री, युवक जिल्हाध्यक्ष संदीप मेस्त्री तसेच १७ प्रभागातील उमेदवार व असंख्य कार्यकर्त्यांसह नागरिक मोठ्या संख्येने सहभागी झाले.
रॅलीदरम्यान नितेश राणे म्हणाले “हे शक्तीप्रदर्शन नाही; हा जनतेचा उत्स्फूर्त प्रतिसाद आहे! भाजपच्या मागे जनता किती ताकदीने उभी आहे हे आज कृतीतून दिसून आले.”
ते पुढे म्हणाले “कणकवलीकरांचा आमदार आता मंत्री आहे. पुढील पाच वर्षांत कणकवलीच्या विकासस्वप्नांना गती देण्यासाठी आम्ही सज्ज आहोत. एक संधी द्या — परिवर्तन हमखास घडवून दाखवू!”
राणे म्हणाले की, “आमच्या प्रतिस्पर्ध्यांना आमच्याशी लढण्यासाठी राणे घरातीलच एक सदस्य लागतो, हा त्यांचा नैतिक पराभव आहे. त्यांच्याकडे स्वतःची ताकद, स्वतःची ओळख नाही.”
“पंतप्रधान नरेंद्र मोदी, मुख्यमंत्री देवेंद्र फडणवीस, प्रदेशाध्यक्ष रवींद्र चव्हाण, खासदार नारायण राणे आणि आम्ही कणकवलीकरांच्या सेवेसाठी वचनबद्ध आहोत. कोणी कितीही टीका करो… ३ डिसेंबर ला भाजपचे सर्व उमेदवार विजयी होतील, याबद्दल आम्हाला पूर्ण विश्वास आहे,” असे ते म्हणाले.
