संकेत नाईक यांना मतदारांचा उत्स्फूर्त प्रतिसाद

शहर विकास आघाडीच्या कार्यकर्त्यांतर्फे केला जातोय 'डोअर टू डोअर' प्रचार
Edited by: स्वप्नील वरवडेकर
Published on: November 29, 2025 12:00 PM
views 40  views

कणकवली : कणकवली नगरपंचायत निवडणुकीच्या अनुषंगाने प्रभाग क्रमांक 15 येथे कणकवली शहर विकास आघाडीचे उमेदवार संकेत नाईक यांच्यासाठी शहर विकास आघाडीच्या कार्यकर्त्यांनी शुक्रवारी सायंकाळी डोअर टू डोअर प्रचार केला. प्रचारात संकेत नाईक यांना मतदारांचा उत्स्फूर्त प्रतिसाद लाभला. माझे बंधू माजी आमदार वैभव नाईक आणि युवा सेना जिल्हाप्रमुख सुशांत नाईक यांच्या मार्गदर्शनाखाली मी ही निवडणूक लढवत आहे. माझ्या दोन्ही बंधूंच्या मार्गदर्शनाखाली या प्रभागाचा निश्चितच विकास करेन, अशी ग्वाही संकेत नाईक यांनी दिली. यावेळी उपस्थित सुशांत नाईक यांनीही‌ संकेत नाईक हेच येथून विजयी होतील, असा विश्वास व्यक्त केला.

प्रचारामध्ये उमेदवार संकेत नाईक, युवा सेना जिल्हाप्रमुख सुशांत नाईक, प्रभाग 13 चे उमेदवार जयेश धुमाळे, प्रभाग 14 चे उमेदवार रुपेश नार्वेकर सहभागी झाले होते. सुशांत नाईक म्हणाले, या प्रभागामध्ये उद्धव ठाकरे मुख्यमंत्री असताना महत्त्वाचा रस्ता तयार करून विजेची सोयही करण्यात आली. आम्ही नाईक कुटुंबीय आतापर्यंत ज्या - ज्या प्रभागांमध्ये नगरसेवक होतो, तेथे कायमच चांगले काम केले आहे. मागील वेळी प्रभाग 13 व प्रभाग 15 या दोन्ही ठिकाणी आमच्या शिवसेनेचे नगरसेवक होते. आम्ही नगरपंचायतीमध्ये विरोधी बाकावर होतो, तरीही या दोन्ही प्रभागांमध्ये दर्जेदार कामे केली आहेत. त्यामुळे येथील मतदार आमच्याच पाठीशी राहतील आणि ३ तारीखला विजयाचा गुलाल आम्हीच उधळू, असा विश्वास सुशांत नाईक यांनी व्यक्त केला. 

संकेत नाईक म्हणाले, या प्रभागामध्ये प्रचारासाठी फिरत असताना मतदारांचा उत्स्फूर्त पाठिंबा मिळत आहे. नारळ निशाणी लाभल्याने हे विजयाचे शुभ संकेतच आहेत. माझे बंधू वैभव नाईक, सुशांत नाईक यांच्या मार्गदर्शनाखाली निवडणूक लढवत असून आम्ही नक्कीच जिंकू व जिंकल्यानंतर माझ्या दोन्ही बंधूंच्या मार्गदर्शनाखाली या प्रभागाचा निश्चितच विकास करेन, असा विश्वास संकेत नाईक यांनी व्यक्त केला. प्रचारात योगेश मुंज, अजित काणेकर, मंगेश राणे, चेतन वालावलकर, रिमेश चव्हाण, राजू शेटये, समीर परब, स्वप्नील पाटील आदी सहभागी झाले होते.