कणकवली : कणकवली नगरपंचायतीचे कणकवली शहर विकास आघाडीचे नगराध्यक्ष पदाचे उमेदवार संदेश पारकर व कणकवली शहर विकास आघाडीचे नगरसेवक पदाचे उमेदवार यांच्यासाठी आमदार निलेश राणे यांनी शुक्रवारी सायंकाळी दोन प्रचार बैठका घेतल्या. यावेळी त्यांनी बाजारपेठेच्या काही भागांमध्ये फेरी मारत नागरिकष व्यापारी यांच्याशी संवादही साधला. नगरपंचायत निवडणूक अटीतटीची आहे. मात्र कणकवली शहर विकासाच्या मार्गावर राहावे, यासाठी आपणा सर्वांचे मत महत्त्वाचे आहे. कोण काय देईल ते घ्या, पण मत नारळालाच द्या, असे आवाहन निलेश राणे यांनी केले.
कणकवली नगरपंचायत क्षेत्रातील बाजारपेठ व वरचीवाडी येथे निलेश राणे यांनी बैठका घेतल्या. यावेळी माजी आमदार राजन तेली, शिंदे शिवसेनेचे उपनेते संजय आंग्रे आदी उपस्थित होते. निलेश राणे म्हणाले, कणकवली नगरपंचायतीवर कणकवली शहर विकास आघाडीचीच सत्ता येणार आहे. सत्ता आल्यानंतर जेवढा निधी मालवणला मिळणार, तेवढाच निधी कणकवली शहरालाही दिला जाईल. त्यामध्ये एका टक्क्याचाही फरक करणार नाही. मी जिथे असतो तिथे शंभर टक्के असतो. कारण हे नारायण राणेंचे संस्कार आहेत.
संदेश पारकर हा तुमचा हक्काचा माणूस आहे. त्यांची सगळी राजकीय कारकीर्द संघर्षाने भरलेली आहे. मात्र त्यांच्या वाट्याला येणारा हा शेवटचा संघर्ष आहे. संदेश पारकर हे कणकवली शहराला जपणारे व्यक्तिमत्व आहे. नगरपंचायत कार्यालय हे मंदिर आहे आणि मंदिराचे पावित्र्य जपायचे असेल तर त्यासाठी संदेश पारकर यांच्या सारखाच नगराध्यक्ष हवा, असेही निलेश राणे म्हणाले.
कणकवलीत आम्ही व्यवस्थेच्या विरोधात लढत आहोत. त्यामुळे हा संघर्ष सोपा नाही. त्यासाठी सर्वांचीच साथ महत्त्वाची आहे, असेही निलेश राणे म्हणाले.
