सावंतवाडी : शासकीय हमीभावाने भात पीक खरेदीसाठी नोंदणी करताना आता ऑनलाईनसोबत हस्तलिखित सातबारा उतारा देखील ग्राह्य धरण्यात यावा, असे निर्देश पालकमंत्री नितेश राणे यांनी जिल्हाधिकारी यांना दिले आहेत. भात खरेदी प्रक्रियेत शेतकऱ्यांची सोय व्हावी यासाठी हा निर्णय घेण्यात आल्याचे त्यांनी सांगितले.
शासकीय हमीभावाने भात खरेदी विक्री संघाकडे सध्या भात पीक खरेदीसाठी शेतकऱ्यांची नोंदणी सुरू आहे. या नोंदणीसाठी जिल्हाधिकारी कार्यालयाने ऑनलाईन सातबारा उतारा सक्तीचा केला होता. यामुळे अनेक शेतकऱ्यांची गैरसोय होत असल्याची बाब पालकमंत्री नितेश राणे यांच्या निदर्शनास आणून दिल्यावर त्यांनी तातडीने यात लक्ष घातले.
यासंदर्भात बोलताना पालकमंत्री नितेश राणे म्हणाले की, "हमीभावाने भात खरेदीसाठी नोंदणी करताना ऑनलाईन आणि हस्तलिखित सातबारा उतारा दोन्ही ग्राह्य धरले पाहिजेत. याकरिता जिल्हाधिकारी यांनी तातडीने आदेश निर्गमित करावेत, असे निर्देश मी देत आहे."
शेतकऱ्यांचे हित जपून त्यांना हमीभावाने भात विक्री करणे सुलभ व्हावे, यासाठी पालकमंत्री म्हणून आपण प्रयत्नशील असल्याचे त्यांनी यावेळी स्पष्ट केले. या निर्णयामुळे भात उत्पादक शेतकऱ्यांना मोठा दिलासा मिळणार असून, नोंदणी प्रक्रियेतील अडथळे दूर होण्यास मदत होईल.
