आंबोली : सिंधुदुर्ग सैनिक स्कूल आंबोली येथे स्मार्ट डिजिटल क्लासरूम व नवनीत टॉप क्लास सॉफ्टवेअर उद्घाटन सोहळा सिंधुदुर्गचे जिल्हा कौशल्य विकास रोजगार व उद्योजकता अधिकारी माननीय सुरज बापूसो देबाजे यांचे शुभहस्ते पार पडला. याप्रसंगी सैनिक शाळेचे अध्यक्ष सुनील राऊळ, सचिव जॉय डोंटस, सैनिक पतसंस्था चेअरमन बाबुराव कविटकर, संचालक शिवाजी परब, सर्व संचालक मंडळ, कार्यालयीन सचिव दीपक राऊळ, शाळेचे प्राचार्य नितीन गावडे, जिल्हा आरोग्य निरीक्षक गणेश जाधव, नितीन नाईक, सर्व शिक्षक, शिक्षकेतर कर्मचारी आणि विद्यार्थी उपस्थित होते.
आजच्या आधुनिक काळात डिजिटल क्लासरूम ही संकल्पना अतिशय परिणामकारक, प्रभावी परिवर्तनशील आणि आधुनिक काळाची नितांत गरज बनली आहे. ही गरज ओळखून संस्थेने संपूर्ण शाळा डिजिटल शाळा बनवण्याचा निर्धार केला. संस्था, पालक आणि विद्यार्थी यांच्या एकत्रित लोकसहभागातून डिजिटल क्लासरूम ही संकल्पना सत्यात उतरली आणि आज स्मार्ट क्लासरूम आणि नवनीतचे टॉप क्लास सॉफ्टवेअर याचे औपचारिक उद्घाटन प्रमुख अतिथींच्या उपस्थितीमध्ये संपन्न झाले. इयत्ता सहावी ते बारावीपर्यंतच्या सात वर्गामध्ये डिजिटल बोर्ड कार्यान्वित करण्यात आलेले आहेत. हे सर्व स्मार्ट बोर्ड इंटरनेटने जोडलेले आहेत व यांचा उपयोग ऑनलाईन आणि ऑफलाइन अध्ययन-अध्यापन प्रक्रिया प्रभावी पणे करण्यासाठी केला जात आहे. सदर स्मार्ट बोर्ड मध्ये अत्याधुनिक असे नवनीत कंपनीचे टॉप क्लास सॉफ्टवेअर देखील घेण्यात आलेले आहे. या सॉफ्टवेअरचा उपयोग इयत्ता सहावी ते दहावीच्या सर्व वर्गांना प्रभावी अध्यापनासाठी होत असून विद्यार्थ्यांच्या अध्ययन क्षमतेमध्ये भरीव वाढ होत आहे. दैनंदिन अध्यापनात खंड पडू नये म्हणून त्याला इन्व्हर्टर आणि जनरेटर चा बॅकअप देण्यात आलेला आहे. शिक्षकांनी सदर तंत्रज्ञानाचा अध्यापनात प्रभावी वापर करण्यासाठी सर्व शिक्षकांना प्रशिक्षण देण्यात आलेले असून अध्यापनात याचा प्रभावी वापर केला जात आहे संपूर्ण सैनिक शाळा ही सीसीटीव्हीच्या निरीक्षण कक्षेत कार्यान्वित करण्यात आलेली असून सर्व क्लासरूम, होस्टेल, भोजन कक्ष या ठिकाणी सीसीटीव्ही बसवण्यात आलेले असून सर्व कॅम्पस सीसीटीव्ही आणि वाय-फाय ने जोडलेला आहे .शाळेकडे अत्याधुनिक संगणक प्रयोगशाळा असून त्याचाही प्रभावी वापर दैनंदिन अध्यापनात केला जात आहे.
प्रारंभी संस्थेचे अध्यक्ष सुनील राऊळ यांनी मान्यवरांचे पुष्पगुच्छ देऊन स्वागत केले व कार्यक्रमाचे प्रास्ताविक केले. आपली शाळा ही जिल्ह्यातील पहिली डिजिटल स्कूल करण्याचे संस्थेने पाहिलेले स्वप्न सर्व शिक्षक, विद्यार्थी व पालकांनी सत्यात उतरवल्याबद्दल समाधान व्यक्त केले आणि सर्वांच्या योगदानाबद्दल संस्थेतर्फे सर्वांचे आभार मानले . एकविसाव्या शतकातील कौशल्य आपल्या विद्यार्थ्यांना प्राप्त व्हावी यासाठी सर्व सुख सोयी प्राप्त करून देण्यासाठी संस्था सातत्याने प्रयत्नशील आहे असे सांगितले. अलीकडेच संस्थेने दोन घोडे शाळेसाठी उपलब्ध करून दिले आहेत. त्याचा सर्व विद्यार्थ्यांनी घोडेस्वारीसाठी उपयोग करून घ्यावा व घोडेस्वारीचे कौशल्य आत्मसात करावे असे आवाहनही त्यांनी केले .त्यानंतर शाळेचे शिक्षक परमेश्वर सावळे यांनी स्मार्ट बोर्ड व नवनीत टॉप क्लास सॉफ्टवेअर वापराविषयी चे प्रात्यक्षिक विविध विषयासाठी विविध उदाहरणे देऊन केले. यानंतर प्रमुख अतिथी सुरज दे बाजे जिल्हा कौशल्य विकास, रोजगार व उद्योजकता अधिकारी सिंधुदुर्ग यांनी विद्यार्थ्यांना विविध स्पर्धा परीक्षा संपूर्ण तयारी या विषयावर सखोल मार्गदर्शन केले. शालेय शिस्त ही व्यक्तिमत्त्व विकासाची पहिली पायरी आहे असे स्पष्ट करून सैनिक शाळेतील विद्यार्थी हे मोबाईल पासून दूर असल्याने चांगल्या सवयी, नियमित व्यायाम वैयक्तिक मार्गदर्शन यामुळे त्यांच्या यशस्वी जीवनाची पायाभरणी सैनिक शाळेमध्ये होत असल्याचे पाहून समाधान व्यक्त केले .त्यांनी विद्यार्थ्यांशी मनमोकळा संवाद साधला व दहावी बारावी नंतरचे विविध करिअर करिअर पर्याय याविषयी सखोल व विस्तृत मार्गदर्शन केले. एमपीएससी आणि यूपीएससी परीक्षांची तयारी कशी करावी याविषयी विद्यार्थ्यांच्या प्रश्नांना अचूक व विस्तृत मार्गदर्शन केले. स्मार्ट बोर्ड व विविध शैक्षणिक सॉफ्टवेअरचा वापर करून आपण एकविसाव्या शतकातील आधुनिक तंत्रज्ञानाचा वापर आपल्या प्रगतीसाठी करून आपल्या व्यक्तिमत्त्वामध्ये सुधारणा करावी व आपले यशस्वी करिअर निवडावे असा मूलमंत्र प्रमुख अतिथींनी विद्यार्थ्यांना दिला. शाळेचे प्राचार्य नितीन गावडे यांनी विद्यार्थ्यांना स्पर्धा परीक्षांचे महत्त्व स्पष्ट करून शाळेच्या विद्यार्थ्यांनी विविध स्पर्धांमध्ये मिळविलेल्या यशाचा आढावा घेतला आणि उपस्थितांचे आभार मानले. कार्यक्रमाचे सूत्रसंचालन श्री एच. बी. अडकुरकर यांनी केले. या कार्यक्रमासाठी सर्व संचालक मंडळ, विद्यार्थी, शिक्षक, शिक्षकेतर कर्मचारी आणि वसतिगृह कर्मचारी मोठ्या संख्येने उपस्थित होते.
