सिंधुदुर्गनगरी : नगर परिषद तसेच नगर पंचायत सार्वत्रिक निवडणुकीच्या पार्श्वभूमीवर जिल्हाधिकारी तृप्ती धोडमिसे आणि जिल्हा पोलिस अधीक्षक डॉ. मोहन दहिकर यांनी सावंतवाडी, वेंगुर्ला, मालवण आणि कणकवली येथे भेट देत निवडणूक तयारीचा सविस्तर आढावा घेतला. मतदान प्रक्रिया सुरळीत, पारदर्शक आणि शांततेत पार पडावी यासाठी आवश्यक त्या सूचना त्यांनी संबंधित अधिकाऱ्यांना दिल्या.

जिल्हाधिकारी धोडमिसे यांनी सर्व निवडणूक निर्णय अधिकारी आणि सहायक निवडणूक निर्णय अधिकारी यांना राज्य निवडणूक आयोगाच्या मार्गदर्शक सूचनांनुसार काटेकोर कामकाज करण्याचे निर्देश दिले. तर पोलिस अधीक्षक डॉ. दहिकर यांनी कायदा व सुव्यवस्था राखण्यासाठी आवश्यक उपाययोजनांवर भर देत सूचना केल्या.

सावंतवाडी : प्रशिक्षण व Strong Room ची पाहणी

दौऱ्याची सुरूवात सावंतवाडी येथून झाली. येथे निवडणुकीच्या विविध टप्प्यांचा आढावा घेऊन जिल्हाधिकारी आणि पोलिस अधीक्षक यांनी प्रशिक्षण सत्र तसेच Strong Room ला भेट दिली.

यावेळी निवडणूक निर्णय अधिकारी श्रीधर पाटील, सहायक निवडणूक निर्णय अधिकारी श्री. जिरगे, पोलिस निरीक्षक अमोल चव्हाण उपस्थित होते.

वेंगुर्ला : १०,११५ मतदार बजावणार मतदानाचा हक्क

त्यानंतर वेंगुर्ला नगर परिषदेत निवडणूक प्रशिक्षणाला भेट देऊन अधिकारी–कर्मचाऱ्यांशी संवाद साधण्यात आला. निवडणूक निर्णय अधिकारी ओंकार ओतारी यांनी जिल्हाधिकाऱ्यांना निवडणूक तयारीचे सविस्तर विवरण सादर केले.

वेंगुर्ला नगर परिषद क्षेत्रात एकूण १०,११५ मतदार असून त्यात पुरुष मतदार ४,८७१ तर  महिला मतदार ५,२४४ एवढे असल्याचे सांगितले. राज्य निवडणूक आयोगाने निर्देशित केलेल्या विविध कक्षांची स्थापना पूर्ण झाल्याचेही त्यांनी नमूद केले.

मालवण : कायदा व सुव्यवस्थेबाबत घेतला आढावा

मालवण नगर पालिका कार्यालयात जिल्हाधिकारी आणि पोलिस अधीक्षकांनी भेट देत निवडणूक तयारीचा तपशीलवार आढावा घेतला. निवडणूक निर्णय अधिकारी सूर्यकांत पाटील यांनी मतदान प्रक्रियेपासून कायदा–सुव्यवस्था उपाययोजनांपर्यंत सर्व माहिती सादर केली.

या भेटीत पोलिस निरीक्षक श्री. जगताप उपस्थित होते.

कणकवली : तहसील कार्यालयात निवडणूक यंत्रणेची पाहणी

कणकवली तहसील कार्यालयातही जिल्हाधिकारी आणि पोलिस अधीक्षकांनी भेट देत निवडणूक व्यवस्थेची पाहणी केली व Strong Room ची तपासणी केली. 

यावेळी प्रांत अधिकारी जगदीश काटकर, निवडणूक निर्णय अधिकारी दीक्षांत देशपांडे आणि सहायक निवडणूक निर्णय अधिकारी श्रीमती गौरी पाटील उपस्थित होत्या.